ধুবুৰী জিলাৰ চাপৰত ৩,২০০ মেগাৱাট ক্ষমতাসম্পন্ন বৃহৎ আল্ট্ৰা-ছুপাৰক্ৰিটিকেল তাপ বিদ্যুৎ প্ৰকল্পৰ দেওবাৰে আনুষ্ঠানিকভাৱে আধাৰশিলা স্থাপন কৰে মুখ্যমন্ত্ৰী ড০ হিমন্ত বিশ্ব শৰ্মাই। আধাৰশিলা স্থাপন কাৰ্যসূচীৰ সময়ত আদানী গোটৰ সঞ্চালক জীত আদানিয়ে মুখ্যমন্ত্ৰী হিমন্ত বিশ্ব শৰ্মাৰ আধুনিক চিন্তাধাৰা আৰু দ্ৰুত সিদ্ধান্ত গ্ৰহণৰ শৈলীক প্ৰশংসা কৰি তেওঁক ‘জেনজিৰ CEO’ (CEO of GenZ) বুলি অভিহিত কৰে। জীত আদানিয়ে প্ৰকাশ কৰে যে এই প্ৰকল্পটোৱে অসমৰ উন্নয়নৰ বাবে এক নতুন অধ্যায়ৰ সূচনা কৰিব। অৱশ্যে প্ৰকল্পটোৰ বাবে স্থান নিৰ্ধাৰণ আৰু ভূ-সম্পত্তি অধিগ্ৰহণৰ প্ৰক্ৰিয়াত প্ৰায় ১৫০০ টা মুছলমান পৰিয়ালক উচ্ছেদ কৰাৰ বিষয়টোৱেও বৰ্তমান ব্যাপক চৰ্চা লাভ কৰিছে।
আদানী পাৱাৰ লিমিটেডে নিৰ্মাণ কৰিবলগীয়া এই বিশাল প্ৰকল্পটোত প্ৰায় ৪৮ হাজাৰ কোটি টকা বিনিয়োগ কৰা হ’ব। এই প্ৰকল্পটোৰ নিৰ্মাণ কাৰ্য চলি থকাৰ সময়ত সৰ্বাধিক ২০ হাজাৰ লোকৰ কৰ্মসংস্থাপনৰ সুযোগ সৃষ্টি হ’ব আৰু ২০৩০ চনৰ ডিচেম্বৰ মাহৰ পৰা পৰ্যায়ক্ৰমে উৎপাদন আৰম্ভ হ’লে প্ৰায় ৫ হাজাৰ লোকৰ বাবে সংস্থাপনৰ পথ মুকলি হ’ব। অনুষ্ঠানত মুখ্যমন্ত্ৰী ড০ হিমন্ত বিশ্ব শৰ্মাই কয় যে ‘Advantage Assam Investor Summit 2.0’ ৰ মাধ্যমেৰে সৃষ্টি হোৱা অনুকূল বিনিয়োগৰ পৰিৱেশৰ বাবেই এই ঐতিহাসিক প্ৰকল্প সম্ভৱ হৈ উঠিছে। এই ৪৮ হাজাৰ কোটি টকাৰ নিৱেশে কেৱল বিদ্যুৎ উৎপাদন বৃদ্ধিয়েই নকৰে, বৰঞ্চ স্থানীয় ব্যৱসায়ী, ঠিকাদাৰ আৰু SGST ৰ জৰিয়তে ৰাজ্যৰ ৰাজহ বৃদ্ধিত বিশেষ সহায় কৰিব।
আদানী গোটৰ তথ্য অনুসৰি, এই প্ৰকল্পটো অসমত তেওঁলোকে কৰিবলগীয়া মুঠ ৬৩ হাজাৰ কোটি টকাৰ শক্তি বিনিয়োগৰ এক ঘাই অংশ। ইয়াৰে ৪৮ হাজাৰ কোটি টকা চাপৰ তাপ বিদ্যুৎ প্ৰকল্পত আৰু বাকী ১৫ হাজাৰ কোটি টকা ২,৭০০ মেগাৱাট ক্ষমতাৰ দুটা ‘পাম্পড ষ্টোৰেজ প্ৰজেক্ট’ (PSP) ত বিনিয়োগ কৰা হ’ব, যিটো আদানী গ্ৰীণ এনাৰ্জি লিমিটেডে ৰূপায়ণ কৰিব। ইয়াৰ উপৰিও গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰৰ নতুন টাৰ্মিনেল আৰু চিমেণ্ট খণ্ডতো আদানী গোটে বিনিয়োগ চলাইছে। চৰকাৰী সূত্ৰৰ মতে, অসমত বিভিন্ন খণ্ডত আদানী গোটসহ অন্যান্য উদ্যোগৰ মুঠ বিনিয়োগ ৮০ হাজাৰ কোটি টকা অতিক্ৰম কৰাৰ দিশে আগবাঢ়িছে, যিয়ে অহা ৩-৪ বছৰত ৰাজ্যৰ আন্তঃগাঁথনি আৰু অৰ্থনৈতিক ছবিত অভূতপূৰ্ব পৰিৱৰ্তন আনিব।
