নিৰ্বাচন আয়োগ বিশেষকৈ মুখ্য নিৰ্বাচনী আয়ুক্ত জ্ঞানেশ কুমাৰৰ ভূমিকা সম্প্ৰতি সমগ্ৰ দেশৰ লগতে অসমতো তীব্ৰ বিতৰ্কৰ কেন্দ্ৰবিন্দু হৈ পৰিছে। এই বিতৰ্কৰ মাজতে অসম নাগৰিক সন্মিলন নামৰ নাগৰিক সমাজৰ গোটটোৱে মুখ্য নিৰ্বাচন আয়ুক্ত জ্ঞানেশ কুমাৰক পদৰ পৰা অপসাৰণ কৰাৰ পোনপটীয়াকৈ দাবী জনায়।
ভোটৰ তালিকাৰ খেলিমেলি আৰু চৰকাৰক সহায় কৰাৰ অভিযোগঃ
অসম নাগৰিক সন্মিলনে এক বিবৃতিযোগে অভিযোগ কৰে যে যোৱা তিনি-চাৰি বছৰ ধৰি নিৰ্বাচন আয়োগৰ মূল উদ্দেশ্য হৈ পৰিছে যিকোনো উপায়েৰে শাসকীয় বিজেপি দলৰ জয় নিশ্চিত কৰা। এই উদ্দেশ্যৰে আয়োগে ‘এছআইআৰ’ প্ৰক্ৰিয়া আৰম্ভ কৰি সম্পূৰ্ণ বেআইনীভাৱে প্ৰায় ১৩ কোটি ভোটাৰৰ নাম কৰ্তন কৰিছে। যিসকলে বিজেপিক ভোট নিদিয়াৰ সম্ভাৱনা আছিল। ৰাহুল গান্ধীকে ধৰি বিৰোধী নেতাসকলে এই বিষয়ে ধাৰাবাহিকভাৱে মাত মাতি অহা সত্ত্বেও আয়োগে ইয়াক কোনো গুৰুত্ব দিয়া নাই। সন্মিলনৰ মতে, এই অনিয়মৰ জৰিয়তে আয়োগে ইখনৰ পিছত সিখন ৰাজ্যত বিজেপিক চৰকাৰ গঠনত সহায় কৰিছে আৰু এই সকলোবোৰ জানিও উচ্চতম ন্যায়ালয়ে মৌনতা অৱলম্বন কৰিছে।
আয়োগৰ ভিতৰচ’ৰাৰ মতানৈক্য আৰু নতুন প্ৰতিবেদনৰ প্ৰভাৱঃ
অসম নাগৰিক সন্মিলনে ২২ ছেপ্টেম্বৰত ‘ইণ্ডিয়ান এক্সপ্ৰেছ’ত প্ৰকাশিত এক অনুসন্ধানী প্ৰতিবেদনৰ উদ্ধৃতি দি কয় যে, তিনিজনীয়া নিৰ্বাচন আয়োগৰ ভিতৰত সৃষ্টি হোৱা তীব্ৰ মতানৈক্যই প্ৰমাণ কৰি দিলে যে বিৰোধীয়ে দীৰ্ঘদিন ধৰি নিৰ্বাচন আয়োগৰ বিৰুদ্ধে যিবোৰ গুৰুতৰ অভিযোগ উত্থাপন কৰি আছিল, সেই সকলোবোৰ সত্য আছিল।
ক্ষমতাৰ কেন্দ্ৰীকৰণক লৈ উদ্বেগঃ
বিবৃতিটোত আয়োগৰ নিয়ম সলনি সম্পৰ্কে এক ডাঙৰ উদ্বেগ প্ৰকাশ কৰা হৈছে। পূৰ্বে ভোটাৰ তালিকা সংশোধনৰ কামৰ বিকেন্দ্ৰীকৃত আছিল। য’ত পৰ্যায়ক্ৰমে বিষয়া সকলে নাম যোগ বা বিয়োগ কৰিব পাৰিছিল। কিন্তু সম্প্ৰতি এই সম্পূৰ্ণ কৰ্তৃত্ব কেৱল মুখ্য নিৰ্বাচন আয়ুক্ত জ্ঞানেশ কুমাৰ আৰু আইটি বিভাগৰ সঞ্চালক প্ৰধান সীমা খন্নাৰ হাতলৈ হস্তান্তৰ কৰা হৈছে, যিয়ে সমগ্ৰ প্ৰক্ৰিয়াটোক একছত্ৰী নিয়ন্ত্ৰণৰ অধীনলৈ আনিছে।
নাগৰিক সমাজৰ স্পষ্ট দাবীঃ
অসমৰ বিশিষ্ট বুদ্ধিজীৱী ক্ৰমে হীৰেন গোহাঁই, হৰিকৃষ্ণ ডেকা, অজিত কুমাৰ ভূঞা, পৰেশ মালাকাৰ, শান্তনু বৰঠাকুৰ আৰু আব্দুল মান্নানৰ দ্বাৰা প্ৰকাশিত এই যুটীয়া বিবৃতিত স্পষ্টভাৱে দাবী কৰা হৈছে যে— “আমাক সদ্যহতে অবিলম্বেই মুখ্য নিৰ্বাচন আয়ুক্ত জ্ঞানেশ কুমাৰৰ অপসাৰণ লাগে। তেওঁ হাতত লোৱা প্ৰতিটো কাৰ্যৰ উচ্চ পৰ্যায়ৰ তদন্ত হ’ব লাগে আৰু এই নীতিবহিৰ্ভূত কাম-কাজৰ বাবে তেওঁক উপযুক্ত শাস্তি প্ৰদান কৰিব লাগে।”
নিৰ্বাচন আয়োগৰ নিৰপেক্ষতাক লৈ কেৱল ৰাজনৈতিক দলসমূহৰে নহয়, বৰঞ্চ নাগৰিক সমাজৰ মাজতো অসন্তোষ আৰু অবিশ্বাস চৰম পৰ্যায়ত উপনীত হৈছে।
